Homenaxe a “Suso do Bahía” polo “seu gran labor” como cronista de Foz

Será substituído polo historiador Xoán Ramón Fernández Pacios.

Xoán Ramón Fernández e Suso Fernández, cronistas de Foz / composición-EP

O Concello de Foz celebrará este domingo, día 11 de xullo, un pleno extraordinario para aceptar a renuncia do actual cronista oficial, Suso Fernández, e a elección do novo, consensuada entre todas as forzas políticas na figura de Xoán Ramón Fernández Pacios.

O pleno formará parte dun acto no que se homenaxeará a figura de Suso do Bahía, que “tanto pelexou pola nosa vila levando o nome de Foz con orgullo por todos os recunchos de Galicia e fóra dela”, sinalou o rexedor, Fran Cajoto.

É un veciño destacado pola súa achega á comunidade en moitos ámbitos”, explicou. O evento, que contará coa colaboración de amigos e compañeiros de Suso, dará comezo ás 18 horas na Sala Bahía e o acceso será limitado baixo invitación, debido ao aforo establecido pola normativa COVID. De calquera xeito a poboación de Foz poderá asistir ao acto de forma telemática, xa que se ofrecerá un directo a través dun enlace nas redes sociais oficiais do Concello de Foz.

Será o periodista Xulio Xiz o encargado de presentar e levar a batuta da celebración, na que intervirán: Antón Niñe, Xosé Carlos Paleo (presidente do CCA-ACIA de Foz), Paco Piñeiro e Francisco Cajoto. A homenaxe contará cun pequeno vídeo na honra de Suso encargado polo Concello e coa achega musical en directo da Banda Municipal de Foz.

O alcalde focego quere “agradecer a valía de Suso e a paixón coa que exerceu o seu cargo de cronista oficial así como á familia e amigos a colaboración para a preparación dunha homenaxe máis que merecida”. A homenaxe a Suso Fernández que comeza este domingo terá continuación coa exposición dedicada á súa vida no edificio do CENIMA, que será inaugurada o xoves 15 de xullo ás 19 horas.

Suso será substituído como cronista polo historiador Xosé Ramón Fernández Pacios, “unha figura idónea para esta figura, como demostra a unanimidade que se acadou na xunta de voceiros previa”, lembrou Cajoto.

RESPOSTAR

Please enter your comment!
Please enter your name here